Rahels Blog

Wichtig!!!
Am Samstig 23. Juni am Namittag am 14.00Uhr würd ich gern zum ne Isatzbricht iilade. Ich wird zeme mit de Lea Bilder vo Ghana zeige und vo üsne Erlebnis verzelle. Ihr sind alli herzlich willkomme im Chilegmeindshuus in Müllheim. Mir freued ois scho mega!
» https://www.evang-muellheim.ch/veranstaltung/1058

Am Sunntig, 1. Juli am Namittag bi de Lea in der Baptistengemeinde in Bülach verzelled mir namal vo Ghana.
Ghana 24.3.2018<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1587</div><div class='usr' style='display:none;'>2</div>

Ghana 24.3.2018

Ghana 24.3.2018<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1589</div><div class='usr' style='display:none;'>2</div>

Ghana 24.3.2018

God word istrue —  Aufschrift auf einem Bus in Ghana<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1584</div><div class='usr' style='display:none;'>2</div>

God word istrue: Aufschrift auf einem Bus in Ghana

2. Juni 2018
Und scho hets wider gheisse Abschiid neh.
Ich bin grad vorher vo de Schuel heicho, wo ich mich vo mine liebe Chindsgi-Chind verabschidet han. Au vo de Lehrer hani mich verabschidet und vorallem d Susi, e jungi Lehrerin in Usbildig, het mich chuum welle gaa loo. Letscht Wuche hend mir si i iri Pfingschtgmeind begleitet und sind vo ire nachher no spontan zu ire hei iiglade worde, zum Fufu esse. Fufu isch übrigens es sehr verbreitets Gricht in Ghana. Es schmöckt chli wie Herdöpfelstock und het aber e chaugummi-artigi Konsistenz. Mir hends innere Tomatesuppe mit Fleisch und Fisch serviert bechoo.
Uf jede Fall het si üs voll is Herz gschlosse und mir si au.

De Abschid vo de Chind, ich vo de Chindergartechind und d Lea vo de Primarschüeler, isch üs ned liecht gfalle... aber au d Lehrer werded üs fähle. Die Ziit in Tamale isch mega schön gsi und isch verbiigange wie im Flug. Am Sunntig gaats nemmlich für üs schowider witer nach Nyankpala. Das isch de Vorort vo Tamale, wo mir schomal gsi sind, ganz am Aafang vo üsere Zit in Ghana. Dette werded mir wider üsi liebe Nachbarschind treffe und werded wider i de Schuel im Nachbarsdorf Tolon helfe, wo mir letscht mal Schuelzimmer gstriche hend und Lehrermaterial vorbereitet hend.

Aber mir werded nüme lang bliibe. D Rückkehr id Schwiiz chunnt gföhrlich nöch... Debii heted mir no meh welle... Nomeh vo Ghana und nomeh Kontakt zum ghanaische Volk. Zum nomel es bitzli meh vom Land zgseh, werded mir no churz vor üsere Abreis id Schwiiz es paar Täg am Meer verbringe. Leider werded mir au nüm allzu lang Ziit haa defür, aber für drüü Tääg Sunne, Meer und Strand hemmer no Ziit.

I Gedanke bereite ich mich langsam scho wider uf d Schwiiz vor. Ich han überhaupt nonig abschätze, wie die Ziit in Ghana mis schwiizer Lebe verändere wird. Was wird mir fähle vo Ghana? Was wird ich i de Schwiiz müehsam finde? Wo wird mis ghanaische Lebe mit mim schwiizer Lebe kollidiere? Und wie gross sind d Usmass vo dere Kollision?
Ghana 2.6.2018 —  Marktleben in Tamale<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1791</div><div class='usr' style='display:none;'>2</div>

Die Ziit in Ghana het mich uf jede Fall sehr vill glehrt über Kultur, Völker, Umwelt aber vorallem au über mich selber. Me unterschätzt liecht, wie sehr me sich selber im ne fremde Land begegnet. Ohni di ville bekannte Ablenkige i de Schwiiz innere fremde Kultur het me vill Ziit zum Denke. (...mengmal au chli zvill.. 😅) Vergangeheit, Zuekunft, Träum, Ziil und Fründe und Familie dihai... alles Sache, wo mich beschäftigt hend. Aber ebe wie gseid, ob oder au wie sehr mich das veränderet het, chani nonig abschätze...

Villmal bini gfragt worde, eb ich Heiweh han. D Antwort isch eifach: Nai. Ich han nie Heimweh ghaa und wird au i de letschte zwei kommende Wuche gar ned dezue choo, Heiweh zhaa. Es lauft eifach zvill.. 😅 Aber Sehnsucht... da hani amel schoo. Sehnsucht nach em chüele Wetter, Sehnsucht nach de Berge und de schwiizer Natur, Sehnsucht nach em ne Joghurt und nach em ne guete Kafi, Sehnsucht nachere Wäschmaschine 😂 aber natürlich au Sehnsucht nach miiiiine Lüüt.. ☺❤ Also bis bald 😘





15. Mai 2018

S Ferieprogramm für d Chind in Wa isch fertig. Mir hend e mega gueti Ziit gha mit de Chind. Au s Sunntigsschuelthema „Hero“, wo mir mit verschidene biblische Gschichte erklärt hend, isch super aacho. En Held in Gottes Auge isch ned unbedingt wie mir Mensche üs en Held vorstelled... Bim David het Gott ufs Herz gluegt und ned uf sis Ussehe, sini Erfahrige oder sis Alter. D Rahab het Glaube ghaa und isch weise gsii aber ned riich, starch oder innere guete soziale Position. De Noah het uf Gott gloset, obwohl ihn defür alli usglacht hend. De Jonah isch en Held gsi, obwohl er am Aafang ned uf Gott gloset het. Und d Esther isch e Heldin gsi, well si für ires Volk weise und muetig zu ihrem König gange isch.

Vor em Unterricht hend mir im Hero-training Spiili mit ihne gspilt, wered em Unterricht hend mir ihne i paktische Ufgabe und Biispil Mathe, Englisch und Informatik zeigt und werend de Pause zwüsched de Lektione hend mir chönne mit de Chind spille und gschprööchle.
D Chind hend de aktivi Unterricht mit Ufgabe und Spili gliebt, hend gmerkt, dass Unterricht au ohni „cane“ (Schlagstock vo de Lehrer) funktioniert und hend chönne Fründschafte schlüsse. Verschlosseni Chind hend sich göffnet, aktivi Chind hend sich chönne ustoobe, stärcheri Chind hend di Schwächere chönne unterstütze und striitendi Chind hend chönne Fride schlüsse. En Vater (Muslim) vo eim Meitli isch zu üsere Überraschig mal id Schuel cho ineluege. Er hegi gmerkt, dass sich sis Meitli, wo ned immer so e eifachi und bravi segi, veränderet het. Si segi „enlightened“. Mehreri Eltere hend d Missionare gfragt, eb si d Schuel nach de Ferie wiiterfüehred. Si welled ires Chind witerhin zu üs id Schuel schicke. Anderi hend sich schmunzelnd beklagt, dass si ihres Chind chuum zum still sii chönd überrede. Si kenned mittlerwile drum üsi Lieder au scho uswendig.
Churz zemegfasst: S Chinderprogramm isch en volle Erfolg gsii!

Am letschte Fritig 4.5.18 hend mir de letschti Schueltag ghaa und hend d Chind verabschidet. Au mir sind offiziell verabschidet worde.
Ghana 15.5.2018 —  Abschied von den vacation school - Schülern in der Rainbow education in Wa.<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1743</div><div class='usr' style='display:none;'>2</div>
Au vo de anderne Lehrer, Haadi, Balica und David hend mir scho am Nomittag müese Abschid neh. Am Samschtigmorge sind mir ganz früeh vom Missionareehepaar Billy und Jo abgholt worde, um rechtziitig a de Busstation in Wa zsii zum nach Tamale zreise. D Stimmig isch bedrückt gsii. Letzti Sache packt, letzti Wort gwechslet, letzti Tipps für Tamale, letzti Bedankige für di gmeinsam Ziit und gueti Zemearbeit, es letzts Gebet und denn hets gheisse, Abschid neh. E churzi Umarmig mit de Jo, en herzliche Händedruck mit em Billy und denn geg Träne kämpfend zum Bus umdrülle und goo. Dette uf em Bussitz bin ich wahrschinlich so wortkarg gsi, wie no praktisch nie i dere ganze Ziit in Wa. Eifach abwartend und immerno geg Träne kämpfend bin ich still nebed de Lea uf em Bank ghocket. So vill schöni Begegnige, so vill gueti Gschpröch und beiidruckendi und wundervolli Moment bin ich i Gedanke nomel duregange. Wo sich denn de Bus endlich in Bewegig gsetzt het und mir zum letschte Mal dur di chlii Stadt Wa, wo mir üs so sehr dri verliebt hend, gfahre sind, hani mini Träne nüm chönne zrugghalte. A üsem gliebte Markt verbii, a üsere geniale Schuel verbii und a de Strass, wo zu üsem Dihai gführt het... Träne sind immerno d Backe durabgrollt, wo mir scho lang üses bekannte Gebiet verlaa hend. Eines Tages wird ich zrugg choo, das han ich mir versproche.

Glücklicherwiis hend mir im Bus nach Tamale nochli chönne schlaafe. Es isch e langi und heissi Fahrt im ne klapperige Bus ohni Air Condition und mit villne Passagier gsi. Zum Glück isch Türe kaputt gsi, das heisst es isch aagnehme Fahrtwind in Bus cho, wos reise trotz allem no ganz aagnehm gmacht het. In Tamale aacho, sind mir vo de Cristina, ennere alte Missionarin vo Hong Kong, am belebte Busbahnhof abgholt worde. Im Auto het si üs scho aakündigt, dass es leider „lights off“ (Stromausfall) seg und si üs drum ned mit em ne chüele Wasser dihai chönned willkomme heisse. Es segi leider hüüfig „lights off“ da in Tamale. ...Und tatsächlich hend mir a dem Wuchenend insgesamt vier Mal Stromusfall ghaa!
Ghana 15.5.2018 —  Dorfleben<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1764</div><div class='usr' style='display:none;'>2</div>


Abgseh daadevo gfallt üs üses neue Dihai sehr gued. Mir lebed wider im ne gschlossene Areal mit fründliche Wachmänner, wo üs immerwidermal eppis i Dagbani biibringed. Natürlich fehled au da d Wachhünd ned. Dasmal hend mir sogar sechs! Zwei devo sind aber erscht zwei Mönet alt und no sehr verspillt. Uf em Areal hets drüü Hüsli; eis für s alte Missionarepäärli vo Hong Kong, eis für s jüngere Missionarepäärli vo Südkorea und es Gäschtehuus mit em Büro. Alli wo da wohned sind voll begeischteret vom Gärtnere und das gseht me am Grundstück natürlich aa. Grad vor üsere Iigangstür hets Bananepalme. Es het mehreri grossi Gmüesgarte und vill Bäum. Unter anderem en grosse Avocadobaum, wo das Jahr leider ned so vill treit het, wider mehreri Mangobäum, Papayabäum, aber leider isch momentan ned Saison und no ganz vill anderi. Jetzt chan me au d Manderiindli ganz riif im Garte direkt vom Baum pflücke.

Am Sunntig sind mir id Chile in Tamale Centre gange. Dette hend mir üsen erschte Gottesdienscht in Ghana erlebt, wo mir üs NED hend müese vorstelle. Allgemein isch Tamale andersch als Wa. D Mensche in Tamale ghöred zum Stamm vo de Dagomba, wo für ihri Impulsivität als ehemaligs Chriegervolk bekannt sind. Mir bemerkeds vorallem bi de Chind, wo muetiger und offener uf üs zuechömed, als d Wala-Chind. D Sprach Dagbani hend mir im Vorort vo Tamale, in Nyankpala, scho es bitzli kenneglernt. Si het Ähnlichkeite mit Wali, de Sprach vo Wa, aber leider sind nur einzelni Wörter gliich. D Stadt selber isch grösser, gschäftiger und vorallem staubiger! Als Wiissi (dagbani: Silinga) fallt me weniger uuf, well sich d Lüüt scho meh dra gwöhnt sind. Au wenn mir immerno eher selte anderi Wiissi gsehnd, hets definitiv meh als in Wa.

Mir helfed sit letschter Wuche i de Schuel „New life college“ mit, wo vom alte Missionareehepaar Cristina und Joshua gründet worde isch. Vor zäh Jahr hend si mit 25 Schüeler und drüü Lehrer s Schueljahr gstartet. Momentan hets i de Schuel (Spilgruppe bis dritti Oberstufe) 880 Schüeler und Schüelerinne! D Lea unterstützt momentan en Primarschüeler wo ned chan lese und nur schlecht chan schriibe. Zudem isch si letscht Wuche spontan für di abwesendi Französischlehrerin iigsprunge. Ich unterstütze de Unterricht innere grosse Chindergarteklass. Obwohl si erscht im Chindergartealter sind, lerned si im Unterricht lese, schribe und rechne. Konzentration isch no e grossi Useforderig für d Chind... de villmal eintönigi Frontalunterricht macht das ned besser. Wered de Schrib- und Rechnigsüebige gang ich dur d Reihe und unterstütz di Schwächere so guets mir möglich isch. I de Pause lieb ichs mit de Chind z spille und umezblöödle oder ihne a de Chletterstange zhelfe. „Aunty Rachel, please help me on the monkey bars!“, töönts denn über de Pauseplatz.

D Chind liebeds au mit mine Haar zspile. „I like your hair!“ ghöri ned nur vo de Chind sondern au vo de Lehrpersone i de Schuel, vo wildfremde i de Stadt und natürlich au vo mine Fründe über What‘s app und Facebook. Bi de Fraag, ebs nur mini Haare seged, lach ich amel luut use! NAI, es sind ned nur mini Haar.. VIER Kunsthaarpäck hends mir in Wa driigflechtet!
Ghana 15.5.2018 —  Haareflechten in Wa<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1736</div><div class='usr' style='display:none;'>2</div>
Si sind z füfte am flechte gsii und hend doch immerno 4h dra gha! Es sind kei klassischi Zöpfli sondern Twists. Die sind in Ghana sehr hüfig aaztreffe. Sowiso hend di meischte Fraue aagflechteti Zöpfli, träged ganz churzi Haar unter em Chopftuech oder sogar e Perücke. Für di staatlichi Schuel müend alli Schüeler d Haar ganz churz trääge. Wenns epper denn irgendwenn doch wachse laat, het er würklich en Afro!

Mir sind glücklich über di sich aakündigendi Regeziit, well si verspricht Abchüelig! Am Sunntigmorge hend mir bi 26°C sogar es bitzli gfröschtlet... haha. S Wetter isch also perfekt gsi, zum widermal en Gottesdienscht under em ne Baum biizwohne. Dee Sunntig hend mir s jüngere Päärli i iri Gmeind im Dorf begleitet. S erschte, was mir gmacht hend, wo mir im Dorf aacho sind, isch natürlich de Bsuech bim Dorfchief gsii. Jedes Dorf het en Chief. Es isch vergliichbar mit em ne Bürgermeischter. Ihm wird sehr vill Respekt entgegebraacht vo de Dorfbewohner. Für alles, was me im Dorf macht, bruucht me s Iiverständnis vom Chief. Seeeehr wichtig!

D Missionare hend üs scho Dihai gseid, dass usgrechnet a dem Sunntig en Pastor wird d Predigt halte, wo ned chan uf Englisch übersetze. Üs hets nünt usgmacht. Lüüt grüesse, Dorflebe gseh und gmeinsami Aabetigsziit heet üs scho voorig glanget. Wo mir denn dette gsi sind, het sich spontan en Übersetzer für üs gmolde, wo di ganzi Predigt vo Dagbani is Englisch übersetzt het. Sini Frau und ihren chliine Sohn sind au bi de Predigt debii gsi. Nebscht ihne sind no drüü anderi Fraue us em Dorf choo und alli zeme (Chind und Jugendlichi sind i de absolute Mehrheit gsi), sind eppe 20 Persone unter em Baum im Schatte ghocket. Nach de Predigt het de Thomas, de Missionar, für s Baby vom Übersetzer betet. Es isch chrank gsi und si hend ihn um es Gebet bittet. Währenddesse isch sini Frau s Desinfektions- und Verbandsmaterial im Auto go hole und het aagfange Wunde vo de Dorfbewohner z desinfisziere und z verbinde. Ich han ihre debii assistiert. D Lea und de Thomas sind i dere Ziit im Dorf gange go d Lüüt grüesse (seeehr wichtig in Ghana!) und hend ihne di usdruckte Familiefotis braacht, wo de Thomas vo ihne gschosse het.
Ghana 15.5.2018 —  Begrüssung im Dorf<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1762</div><div class='usr' style='display:none;'>2</div>

Für villi isches s erschte Familiefoti gsi, wo si jemals i de Händ ghalte hend. Nachdem di letschte Wunde verarztet gsi sind, hend mir üs verabschidet und hend üs uf de Heimweg gmacht. Drüüviertelstund Heimweg und eppe d Hälfti devoo über Holperpischte im Busch! Aber üsi gröschti Überraschig vo dem Sunntig hend mir erscht bim Gschpröch mit em Thomas und sinnere Frau, de Tschong nim (oder soo.. ^^), im Auto erkannt; de Übersetzer segi gar kein Chrischt gsii. Überhaupt segi das s erschte Maal gsi, wo er a irem Gottesdienscht teilgnoo heg. Er seg Muslim. Aber er isch ned mal elei choo, sondern het grad au no sini Frau und sin chranke Sohn mitgnoo. Und nach em Gottesdienscht het er de Missionar um es Gebet für sin Sohn bittet....mir sind us em stuune chuum me usechoo... Uf jede Fall sind mir denn für de Zmittag bim Päärli iiglade worde. Es segi e chrischtlich-südkoreanischi Tradition, zum nach em Gottesdienscht zeme Zmittag zesse. Also sind mir widermal in Gnuss choo vo de chalte, südkorenische Nudelsuppe mit Iiswürfel und Ei. Natürlich hend mir mit Stäbli gesse... und ich mues da churz es Eigeloob a üs usspreche... Mit Stäbli esse chönd mir echd super! ^^

Mir sind dankbar für alles, was mir scho erlebt hend und gspanne uf das, wo üs no erwartet!
Grüessli us Tamale vo de Lea und mir :)
13. Mai 2018
Vor zwei Wuche hend mir am Fritig 27. April 2018 dörfe is Dorf Dignafuro go übernachte. S Lebe dette im Dorf isch seeehr afrikanisch! ...oder zumindescht han ich mir s Lebe in Afrika memgmal so vorgschtellt. D Hüser sind us Lehm, kei teereti Strasse, alles schiint gmüetlich und entspannt.

Am Fritig sind mir dette acho und sind, wie scho d Wuche vorher, durs Dörfli vo Huus zu Huus glaufe und hend d Lüüt grüesst. Begrüessige und Smalltalks mit Nachbare und Fründe isch in Ghana (und vorallem i de Dörfli) seeeehr wichtig! Denn hend üs d Missionare verabschidet und mir hend üs im Huus vom Imam (religiöse Füehrer vo de Muslime) vom Dorf chönne iiquartiere... Ja.. Mir als Chrischte als Gascht bim Imam im Huus... dadezue chumi no... Mir hend denn de Abig im Dorf verbracht mit Gschichte de Chind verzelle i de chline Dorfsbibliothek, tanze und trommle, lokalem Znacht (TZ mit Tomatesuppe) und schlafe i de Lehmhütte.

A dem Abig und am nöchschte Tag sind mir vom Haadi begleitet worde. De Haadi isch i üsem Alter und de Sohn vom Imam vo dem Dorf. Ihn hend mir vorher i de Schuel scho kenneglernt. Er het gmeinsam mit em Balica PC-Lektione unterrichtet. Ja....d Lea und ich hend au müese schmunzle... De Sohn vom ne Imam unterrichtet innere chrischtliche Schuel.... Spöter sind mir Gäscht gsi im Huus vom Imam... mir hend denn usegfunde dass s Missionareehepaar de Haadi und sini Familie scho lang kennt. Wo si zimmlich neu in Wa gsi sind, hend si welle während em ne Jahr ines Dorf go wohne, zum de Bevölkerig und de Kultur nöcher zchoo. Si hend verschideni Dörfer bsuecht. Wo si emal wider unterwegs gsi sind ines Dörfli, hend si en Bueb uf de Strass gfragt, eb er us dem Dorf dette chömi, wie das Dorf heissi und wie sin Name segi. Das isch de Haadi gsi. Im Dorf Dignafuro hend si sich vo Afang aah wohl gfühlt.
Ghana 13.5.2018 —  Ehemaliges Zuhause der Missionare (Toilette/Bad rechts neben der Tür) und Nachbarshaus des Imams<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1708</div><div class='usr' style='display:none;'>2</div>
So sind si bald Nachbare worde und hend e gueti Beziehig zuenenand chönne ufbaue. Si hend ihn i sinnere Schuelbildig chönne unterstütze und lönd ihn au immerwider eppis i de Schuel schaffe, damit er sich bald sini Usbildig chan leischte.

All das het er üs verzellt, wo mir am Samschtigmorge nach de obligatorische Begrüessigsrundi i de Nachbarschaft mit ihm durs Dörfli und Nachbarsdörfli bis zum Staudamm glaufe sind. Mir hend debii vill Ziit gha zum über Gott, üsi beide Welte und Zuekunft zrede. Uf em Weg sind mir immerwider a Lüüt verbiicho wo üs hend welle grüesse. Uf em Rückweg sind mir spontan iiglade worde für Maischolbe, Yam und chüels Wasser.
Ghana 13.5.2018 —  auf dem Rückweg in Haadis Dorf, spontane Einladung zum Essen, Dorfbewohner am Maiskörner sortieren<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1724</div><div class='usr' style='display:none;'>2</div>

D Chind am Wegrand und Fraue wo üs entgegecho sind, hend üs Shea-Nüss geh und uf de Hälfti vom Rückweg sind mir vom ne Drürad-Töff mit Pickupanhänger mitgnoo worde.

Zrugg im Dorf hend mir nomel TZ becho bevor mir em Billy weg em Abhole im Dorf aglüte hend. Au de Haadi isch mit üs zrugg id Stadt cho. Unter de Wuche, wenn er am schaffe seg, wohni er bi sinnere Schwöschter i de Stadt. Aber er segi lieber im Dorf. Dötte fühli er sich freier. Leider segi er aber eine vo de einzige, wo so denki... Alli Junge us em Dorf wölled id Stadt zum Vortschritt, de Jobs und zum vermientliche Riichtum. Wo mir wider i üsem Dihai i de Stadt aacho sind, hend mir üs tatsächlich au gfühlt, als wenn mir ine anderi Welt chömed. Ich han i dem Moment di junge Dorflüüt chönne verstaa, dass si sich nach em ne Lebe i de Stadt sehned. D Hüüser sind nüme us Lehm, d Strasse sind ebe und me lebt allgemein privater und isch weniger uf d Gmeinschaft aagwise. Aber de Haadi het au Recht gha, wo er gseid het, dass me im Dorf freier seg und freier chönni lebe. D Lea und iich weered seeeehr gern no länger im Dorf blibe.
22. April 2018
Dä Pastor Joshua het üs am morge abgholt zum mit üs is Dorf fahre. Am Gottesdienscht hend eppe 50 Lüüt teilgnoo.
Ghana 23.4.2018<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1680</div><div class='usr' style='display:none;'>2</div>


Mir sind uf Plastikstüel unter em Baum ghockt und hend zueglost.
Pastor Joshua ist Pfarrer in diesem Dorf. Im Dorf treffen sie sich schon früher am morgen für „sunday-school“. Anschliessend kommt Pastor Joshua, der in der Stadt Wa wohnt, und predigt. Natürlich gibt es zuvor einen Lobpreis und eine laaaange Gebetszeit (oder zumindest war diese gestern lang), dann die Predigt und danach nochmals einen Lobpreis mit Kollekte und dann ein Abschlussgebet.

Nach em Gottesdienscht hend üs natürlich alli welle d Hand schüttle. ...di meischte sind mehreri Maal cho... Irgendwenn sind alli um üs umegstande. Mir sind natürlich total im Mittelpunkt gsi. Au a üsne Haar hends meeega Froid gha. D Lüüt us em Dorf hend kei Englisch verstande aber das het üs ned devo abghalte zeme zlache und Seich zmache. Wo d Lea und ich denn agfange hend singe, hend üs alli ufmerksam zueglost.

Nachdem mit üs denn endlich hend chönne loosrisse, sind mir mit em Pastor Joshua no i abglegeneri Dörfli gfahre, zum zwei jungi Männer heiztue. D Stasse i die Dörfli sind meh eifach Wäägli durch d Büsch gsii.
Ghana 23.4.2018<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1676</div><div class='usr' style='display:none;'>2</div>
Vor de Stadt isch denn d Strass wider breiter worde. Natürlich isch d Stass erscht i de Stadt wider teeret gsi.
21. April 2018
Scho en drittel vo üsere Ziit in Ghana isch um... Wow! es fühlt sich aah, als weer i erscht grad würklich aacho da in Ghana. Aber umsomeh chan und will ich die Ziit wo no bliibt jetzt no gnüsse!

Letscht Wuche isch vill loos gsi. Scho am Sunntig aabig hend d Lea und ich neui Gsellschaft bechoo i üsem Hüüsli. Es Ehepäärli us Hong Kong, wo sich uf em ne Iisatz in Ghana kenneglernt het, het die Wuche mit üs zeme im Huus gwohnt. Si sind alti Fründe am bsueche gsi in Ghana. Scho ab em Mäntig sind si voll mitdebii gsi i de Schuel.

Mir hend aafang wuche s Chinderprogramm i de Schuel gstartet. scho am erschte Tag sind, zu de Überraschig vo de Missionare mega vill Chind choo. Di letschte Jahr seged am Aafang amel recht wenig choo und erscht im Verlauf vo de Wuche sind meh dezue choo. Das Jahr hend mir scho am Ziischtig i de 5. Klass 18 Chind ghaa! Am End vo de Wuche hend mir insgesamt über 43 Chind ghaa! Meh als d Hälfti vo de Chind sind Muslim, obwohl d Schuel chrischtlich isch. PC-lektione seged sehr gsuecht in Ghana well sich di meischte staatliche schuele kei PC’s chönd leischte. Zudem chunnt no, dass die Schuel scho en recht guete Ruef het und so au über Mundpropaganda Werbig gmacht wird.

Mir hend letscht Wuche also alli Händ ztue gha mit Lektione vorbereite, Lektione nachbereite und üs sache für d Sunntigsschuelslektion züberlegge. Am Mittwoch isch denn s Missionareehepaar mit ihrem 15jährige Sohn nach Accra greist, zum ihn uf de Flughafe bringe. Sini Ferie sind jetzt verbii und er mues zrugg is Internat für Missionarschind in Kenia. erscht hüt aabig isch s Ehepäärli wider da in Wa aacho. Zum Glück hend d Lea und ich während de Schuelwuche no s andere Päärli us Hong Kong bi üs gha, wo mit üs het chönne zemeschaffe. si hend d Willkommens-Spiil-und-Spass Lektion am Morge gmacht und hend mich i de Englischlektione und d Lea i de Mathelektione unterstützt. Di beide ehemalige Schüeler us Wa, de Baleka und de Hadi hend zeme d PC-Lektion duregführt.
Ghana 21.4.2018 —  Die Kinder des Ferienprogramms in der Rainbow Education Schule in Wa<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1658</div><div class='usr' style='display:none;'>2</div>
D Chind hend mega Spass gha und sind gern id Schuel choo. Mit de Ziit sind si denn au öfters zu üs cho und hend mit üüs aagfange rede und spile. Am Fritig hend mir denn würklich Ziit gha zum mit ihne spile und kreativ zsii. Für de Taag hend mir nach Spiel und Spass nur e „Sport-Lektion“, Zeichnigslektion und d Sunntigsschuelslektion gha. Also viiill Ziit zum spile und umeblöödle mit de Chind! Aber au mir Lehrer hend natürlich üsen Spass gha!

Nach Schuelschluss am 13:00 sind mir z vierte hei i üses Huus, sind üs go erhole und hend für de nöchschti Taag d Lektione vorbereitet. Am Znachttisch sind mir denn schiinbar alli wider wach worde und hend gred und gred und gred. Es sind amel meega interessanti Gschpröch entstande über d Schwiiz und Hong Kong. Ich han üsi „cross cultural-Öbig“ meeega gnosse! Mir hend gegesiitig fürenand kochet und hend gred bis üs fascht d Auge zuegheit sind. D Lea und ich hend während dene öbed au erkannt, dass s Lebe und d Lüüt in Hong Kong recht ähnlich sind wie i de Schwiiz... Ehrlichgseid hets üs sehr gluschtig gmacht, üs persölich devoo zgo überzüüge....... 😉 Was s Ehepäärli gluschtig gmacht het, üs i de Schwiiz cho go zbsueche, isch natürlich d‘Schwiizer Schoggi gsi, wo mir ihne gschenkt hend... si hend die Schoggi i de Händ ghebed als weers Gold und hend si „in den höchsten Tönen“ gloobt! Gescht isch üsen letschte gmeinsame aabig gsi.
Ghana 21.4.2018 —  Herumalbern mit dem Ehepaar aus Hong Kong, das mit uns die Wohnung teilte. Im Hintergrund: Rainbow Education School in Wa<div class='url' style='display:none;'>/</div><div class='dom' style='display:none;'>evang-muellheim.ch/</div><div class='aid' style='display:none;'>106</div><div class='bid' style='display:none;'>1659</div><div class='usr' style='display:none;'>2</div>
Mir hend en demit verbracht, enand kantoneischi und schwiizerdütschi Zungebrecher biizbringe.......und mir hend üs alli kuglet vor lache! 😂 D Videos vo de Zungebrecher werded mir natülich no lang als Erinnerig bhalte! Hüt morge hend mir denn leider müese Abschid neh. Si sind zrugg nach Tamale gange und werded dette nomel e Wuche verbringe, bevor si zrugg nach Hong Kong gönd. I irer Zuekunft wond si gmeinsam e Bibelschuel in Amerika mache zum selber uf Mission zgoo. Wo si wönd hii und eb si die Schuel überhaupt chönd mache, isch für si leider no unklar.

Morn werded d Lea und ich vom ne lokale Pastor abgholt zum ihn und sini Familie in Gottesdienscht im Dorf zbegleite. Ich hoff, ich chan es paar Fotis mache, wo me denn uf mim Blog chan go aaluege. Mir freued üs scho riisig druf und sind mega gspannt, was üs wird erwarte!

Ich han ghört, dass ihr momentan super schöns Wetter i de Schwiiz gnüssed... Gnüssed de Schwiizer Früehlig nochli für mich mit... Ich schick eu defür nomel es paar Sunnestrahle vo Wa in Ghana ☀✨

Also Gebetserhörige sind:

• mega vill Chind i de Schuel
• gueti Reis für s Missionareehepaar und ihren Sohn
• gueti Lektione
• mega vill Spass mit de Chind und de anderne Lehrer
• meeegaaa vill Spass mit em Päärli us Hong Kong
Mir sind mega dankbar für die Sache und wönd Gott defür mega danke!

Gebetsaalige für di nöchscht Wuche sind:
• Beziehige zu de Chind vertüüfe
• d Herze vo de Chind erreiche
• gueti Planige für hilfrichi Lektione für d Chind
• gueti Ziit und Gschpröch mit de Dorfbewohner und andere lokale Lüüt
15. April 2018
S Lebe in Ghana isch komplett andersch. Ich merke, wie ich mich dem Ghana-Lebensrythmus aapasse. Sache ned so ernscht neh, mit ere seelerueh mini Arbeite mache, füfi graad stoh laa wenn i eppis fertig gmacht han und lieber mal im ne churze Gschpröch verwiile, als wiiter iichaufe. Mini Gangart isch in Ghana zum ne Schlendere worde und mis Velofahre zum ne gmüetliche Trample. Mini schwiizer Armbanduhr liit i mim Rucksack ganz une. S ghanaische Verständnis vo Ziit unterscheidet sich komplett vo de Schwiiz. Während me i de Schwiiz en Termin uf e genaui Ziit abmacht, gits da in Ghana genau füüf ziite wo me abmacht: early morning, morning, afternoon, evening and night.

Während me jetzt i de Schwiiz nach 10min Verspötig vom Kolleg scho langsam chli unruhig wird, wartet me in Ghana am morge am 8:00 hald bis am 9:30 und eventuell no länger, bis me denn mal aalütet und fragt, woner isch.

En guete Kolleg vo mir het mir gseid: „Rahel, in Ghana wirsch kei Sorge me haa“ Elias, du hesch Recht gha! 😅👍🏼 Es isch aber es Ziitli gange, bis ich würklich han chönne die 4 Gäng abeschalte und da würklich aacho. Au jetzt han i mengmal no s Gfühl, dass mich mini Schwiizer-Wurzle nochli unruhig oder ungeduldig mached, i gwüssne Situatione. Aber im Grosse und Ganze hani mi jetzt sehr sehr guet a Ghana gwöhnt. Ich chan mittlerwiile au d Hitz gnüsse. Am Aafang het min Körper recht kriselet.. Was irgendwie au verständlich isch, wenn me vo 4°C zu 38°C Tagestemperatur wechslet. Aber wie gseid, het sich min Körper jetzt aaklimatisiert.
D Vorbereitige i de Schuel sind jetzt abgschlosse und morn chas loosgo mit em Ferieprogramm. Ich unterrichte Englisch zeme mit em Hadi, em ne ehemalige Schüeler und Sohn vom Imam vom Nachbarsdorf und d Lea unterrichtet Mathe zeme mit em Billy, em Missionar us Hong Kong. Sini Frau, Jo, unterrichtet PC-Lektione mit em ne andere ehemalige Schüeler, em Bareka. Jetzt hoffed mir uf villi Schüeler.

Hüt gönd mir zum erschte Mal do id Chile. D Organsiation „Evangelic Church of Ghana“ isch ursprünglich vo WEC (d Organisation, wo ich jetzt begleite) gründet worde, und het sich scho elei chönne wiiterentwickle in Ghana. WEC het bruchts dette als Unterstützig nüme. Si konzentriered sich momentan uf hauptsächlich muslimischi Regione und Volksgruppe in Ghana wo immerno nünt, nur schlechts oder unwahrs über s Chrischtetum ghört hend. bispilswis s Missionareehepaar da in Wa erreicht die Mensche über die verschidene Schuelkürs, wo si aabüted (vorallem PC-kürs) und Beziehige wo si pfleged. Au mir hend bemerkt, dass es überhaupt ned schwer isch da Bekanntschafte zmache. Sobald me d Lüüt i irer Spach Wali begrüesst het, isch me scho fascht im Gschpröch. Begrüessige und churze Small Talk und s Pflege vo Fründschafte het i de ghanaische Kultur en sehr hoche Stellewert und d Mensche nemed sich defür au vill Ziit. Für üs isches no weniger schweer irgendwo is Gschpröch zchoo, well mir ja sowiso uffalled mit üsere Huutfarb. Alli lueged üs neugirig aa und freued sich meischtens mega, wenn mir denn uf si regiered. Da het zum biispil gescht dezue gführt, dass mir es chlises Photoshooting im Supermarkt verastaltet hend... 😅 Es paar jungi Fraue hend üs heimlich welle fotografiere.. Da isch vo üs ned unbemerkt blibe. Drum han ich si gfragt eb si mit üs zeme wend es Foti mache. Sind si total begeischteret gsi und natürlich het denn jedi au no einzeln es Foti mit üs welle mache. Das isch widerum au vo anderne im Lade ned unbemerkt blibe also hend mir s gliiche no mit zwei junge männer und nomel ennere chline gruppe fraue gmacht...
Ghana 15.4.2018 —  Lea mit Velo

wenn mir mit üsne neue tolle Velos chli d Stadt erkundet oder gönd go poschte, falled mir bsunders uuf.. Mir hend üs lang gfragt warum alli üs so aagrinsed wenn mit mir em velo unterwegs sind... well mir velofahred? well mir wissi sind und velo fahred? Well mir fraue sind und velo fahred? Well mir wissi fraue sind und velo fahred? Hüt morge hend mir denn erfahre, dass nur armi lüüt oder alti lüüt, wos no us tradition mached, velo fahred. Alli andere würded au als art statussymbol mit em mofa oder auto unterwegs sii.. und dass mir als „riichi westler“ velofahred isch für si drum en widerspruch.
uf jede fall hend d lüüt denn au mega freud, wenn mir ihne zuewinked oder si grüessed. Wenn üs chind gsehnd schreied si üs naa: „Nansaala, Nansaala!“ (oder soo.. ned sicher wie me da in Wali schribt.. 😅) Zu Teil schreieds üs au das naa, wo si bi sich i de Schuel lerned: „Nansaala, How are you? I am fine, thank yooouu“ Nansaala heisst Wiissi in Wali und me munklet, dass es vo Nazaretaner chunnt, well di wiisse wo amel da gsi sind, chrischte (Nachfolger vom Jesus vo Nazaret) gsi sind.

Uf jede fall gnüssed mir jetzt no üsen mega sunnige und heisse nomittag und freued üs uf de start vom ferieprogramm morn.

Well hüt Sunntig isch und ich momentan vorallem eif dankbar bin, hüt nur Sache zum danke:
• s guete Aklimatisiere in Ghana
• di guete erschte Kontäkt wo mir scho hend chönne mache
• das super mega lässe Missionarsehepaar! ☺
• dass d Lea und ich soooo gued mitenand uschömed, obwohl mir üs vorher ned kennt hend!!
• di bisherige Erfolg und guete Beziehige wo WEC het chönne mache
• die ville lüüt wo üs im Gebet unterstützed! ❤ Danke vill vill maal dafür! 😘

Sunnigi Grüess us Wa in Ghana.
11. April 2018
hallooo zeme :)

Ich weiss, ich weiss... scho vill zlang keis update meh.. ich will eu i nöchschter ziit chli meh uf em laufende halte. Es wird über di letschte zwei Wuche in Nyankpala sicher no en rückblick geh wo ihr denn uf de homepage vo de evangelische chile chönd naalese.

Aber jetzt zu üsere jetzige situation. Mir sind geschter in Wa aacho. Mir hend widermal e problemlosi reis ghaa und sind mega dankbar drüber. Mir hends wider mega gued mit em missionareehepaar wo üs bereits in accra willkomme gheisse hend. Da in Wa wohned mir jetzt i üsem eigene huus. es isch recht gross und het au en recht grosse vorhof. um de vorhof hets e hochi muur und jetzt hend mir vier wachhünd. also mir fühled üs da zimmlich sicher.. 😅👍🏼

Hüt sind mir s erschte mal i de schuel gsii wo denn s ferieprogramm während drüü wuche für chind wird stattfinde. wered dem programm, wo nöchscht wuche startet, werded si spiel spille, und inputs haa.. aber si werded au i mathe, englisch und pc-lektione haa. Ich wird englisch lektione mache und d lea wird im matheunterricht mithelfe und au unterrichte.
Wir bringen auch die Schweiz ein bisschen nach Ghana.... einige der Kinder haben gelernt in Schweizerdeutsch zu zählen. Ibrahim zeigt hier sein Können.

Momentan sind mir also am vorbereite für die drüü wuche, am chind iilade, eltere informiere und nebedbii wönd mir au nochli d sprach Wali lerne. Die sprach isch nomel andersch vo de sprach dagbani wo mir scho bizli kenneglernt hend in Nyankpala. Das heisst also; alles nomel noi lerne.. 😅📚
also gebetsaalige sind:
• Gueti vorbereitig fürs ferie-chinderprogramm
• Vill chind wo chönd teilneh
• offeni herze vo de teilnehmer
• gueti beziehige

24. März 2018

Es isch mega schön daa in Ghana :) mir hend e mega gueti Reis gha nach Accra, de Hauptstadt vo Ghana. Mir sind am Flughafe vom ne Mitarbeiterehepaar Billy und sini Frau Jo vo WEC mit Wurzle in Hong Kong bereits erwartet worde. Si hend üs denn zwei Täg lang in Accra begleitet und sind mit üs id Märkt gange.

Hüt morge sind mir früeh ufgstande und vom Billy uf de Bus nach Tamale bracht worde. Momentan bin ich also mit de Lea im Bus. (soooo unglaublich bequemi Bussitz hani no niiieee gha! 😍)
Weg em esse hend mir üs au nie müese Sorge mache. Nur scho d Uswahl a Frücht isch risig und alli sind meeega süess! Es git sogar Öpfel... Aber wa will ich als Thurgauerin in Ghana mit em ne Öpfel..?! 😂 Villes chan me problemlos au vo de Strasseständ esse. Billy und Jo hend üs chli gseid uf was mir selled achte und hend üs zu feine Essensständli bracht. Üses Motto, wo mir als Schwiizer wohl sicher am aafang aber trozdem no setted beachte, isch: „Cook it, peel it or forget it!“ 😂👍🏼

Markt in Ghana 24.3.2018

Mir werded überall neugiirig betrachtet. Im ne Lade geschter hend anschiinend d Mitarbeiter über üs
gseid: „Wow! Si sind sooooo wiiss! Die sind us de Schwiiz.. Die sind im Schnee ufgwachse... dene iri Huut isch so wiiss wie Schnee!“ Natürlich hend d Lea und ich nünt verstande, aber de Billy hets üs nachher im Auto schmunzelnd verzellt. Aber au mir sind immerno total fasziniert vo de Mensche daa in Afrika. Si sind mega fründlich und so hilfsbereit wie ichs no selte im ne Land han chönne erlebe! Ires Lache isch mega herzlich und unglaublich aasteckend. Uf de Märkt lauft mega luuti Musig wo einigi au dezue tanzed. „How are you?“ „Are you from Germany?“ „Welcome in Ghana!“ sind so Sache wo mir vill ghört hend geschter uf em Markt. Wenn me denn sich es bitzli Ziit nimmt und staablibt wird me mega schnell ines Gschpröch verwichlet. Ghanaer sind mega offe.

Es isch alles meeeega farbefroh. Mir sind geschter go Stoff chaufe, zum üs denn in Tamale ghanaischi Kleider naihe zloo. (Fotis werded no folge... 😉) Überall uf de Strasse hets Lüüt wo alles mögliche verchaufed. Da bin i mir vo Asie ja schochli gwöhnt... Aber da in Ghana bin ich total devo fasziniert, dass alli iri Platte, Schüssle, Glaskischte und Säck uf em Chopf träged. Männer und Fraue und Chind träged alles uf em Chopf und sind debii wahnsinnig gschickt!

De Billy und d Jo hend üs erklärt, dass vorallem d meitli scho als chliini Chind e chlini Schüssle
überchömed zum uf em Chopf träge. Wenns di chli Schüssle im Griff hend, chömeds e grösseri über und so wiiter bis schlussendlich eigentlich alles chönd träge. Si hend üs lachend erklärt, dass Ghanaer i de Chile mengmal sogar d bible uf em chopf träged! 😂

Spiritualität isch aber für Ghanaer sowiso es grosses Thema. wenn epper im ne Unfall stirbt, sich epper verletzt oder sich Wunde (weg de tropische Hitz oder de Flüge) ned schlüssed, isch das e Bestrafig vo Gott. Wele Gott wird aber meischtens offe glaa. Uf villne Schilder vo Läde, Werbeschilder oder au uf villne Autochläber stönd sache wie: „God is good“ „Remeber God“ „the lord‘s doing“ aber au sache wie: „allah is great“ oder „jesus saves“ „Accra for Christ“ All die Ussage seged aber ned so wahnsinnig ernscht gmeint... es segi meh e Verchaufsstrategie als würklich en „spirituelle Reminder“
God word istrue —  Aufschrift auf einem Bus in Ghana


S Klima isch sehr füecht und heiss. D temperatur isch jetzt immer um di 30°C gsii. Ich mues mich da no sehr drah gwöhne.. d Lea het da zum Glück weniger Problem... 😅Hüt nacht isch grad de erschti Rege
in Accra gfalle. De Billy het erklärt, dass es de Aafang vo de Regeziit im Süde vo Ghana isch. ...aber nöd im Norde, wo mir üsi drüü mönet werded verbringe. Dette isch momentan Trocheziit. es isch no heisser, als im Süde, aber zum Glück au trochener. D Regeziit im Norde wird erscht in Juni aafange.

Uf jede Fall sind mir jetzt im Bus nach Tamale. Dette erwartet üs s Hauptleiter-Ehepaar vo WEC Ghana.

Mir freued üs sehr uf alles, was üs no wird erwarte! ☺👍🏼
Ganz liebi Grüess vo üs beidne us Afrika! ☺❤
Kurzzeiteinsatz in Ghana
150 Bilder
Fotograf/-in Rahel Aerne
150 Bilder
Verantwortlich: Florian Homberger     Bereitgestellt: 03.06.2018     Besuche: 40 Monat 
aktualisiert mit kirchenweb.ch